Transparencia e goberno aberto

A Lei 1/2016 de transparencia e bo goberno integra toda a regulación referida á rendición de contas dos poderes públicos galegos para lle dar resposta á crecente exixencia cidadá de control público sobre a actividade das institucións, así como á necesidade de adaptación da lexislación galega á normativa básica. Neste sentido, o devandito texto regula a transparencia e a publicidade na actividade pública, ademais do dereito da cidadanía a acceder á información pública. Establece tamén o réxime xurídico das obrigas de bo goberno que deben cumprir tanto o sector público autonómico como as persoas que ocupen altos cargos nel, incluíndo o seu réxime de incompatibilidades, de conflito de intereses e de control dos seus bens patrimoniais.