A escena profesional galega recibirá 870.000 euros en axudas da Xunta para crear novos espectáculos de teatro, danza, circo e maxia

O Consello da Xunta deulle hoxe luz verde á convocatoria para 2026 de subvencións da Axencia Galega das Industrias Culturais á creación escénica, nas cales se consolida a dotación de 870.000 euros para a produción de novos espectáculos de teatro, danza, circo e maxia por parte de compañías profesionais galegas. A devandita liña de apoio aumentara este ano un 8,7 % a súa contía respecto a 2024 para favorecer especialmente os proxectos plurianuais das empresas con máis ampla traxectoria, circunstancia que tamén se mantén nas bases aprobadas hoxe.

Así, a modalidade cuarta destas axudas volverá contar con 300.000 euros, 100.000 euros máis que en 2024, para potenciar o traballo a medio prazo e a continuidade dos equipos e proxectos de compañías cun funcionamento de cando menos 10 anos e unha solidez acreditada. Deste xeito, poderán subvencionarse ata tres proxectos para o trienio 2026-2028 cun máximo de 100.000 euros cada un e un límite do 80 % sobre o orzamento subvencionable. As compañías adxudicatarias nesta categoría en 2025 foron Redrum Producións, a recente Premio Nacional de Circo Pistacatro Produtora de Soños e Producións Teatrais Talía.

Apartados para compañías emerxentes e para danza

Os demais tres grandes apartados previstos nas bases refírense a espectáculos de empresas de nova creación (modalidade 1), ao ámbito do teatro, novo circo e maxia (modalidade 2) e ao eido da danza e as artes do movemento (modalidade 3).

Na categoría para produción de teatro, circo e maxia, seguen a reservarse 400.000 euros para apoiar novas propostas, que poden acadar axudas de ata un 75 % do seu orzamento, cun límite de 60.000 euros por espectáculo. Outros 100.000 euros están destinados a montaxes de danza e artes do movemento, tamén ata o 75 % e cun máximo fixado en 37.500 euros. Para os proxectos de empresas de nova creación, a convocatoria destina unha partida de 70.000 euros cun límite de 20.000 euros por adxudicación e ata un apoio máximo do 90 % sobre o orzamento presentado.

A de creación escénica é a principal das liñas de subvención da Consellería de Cultura, Lingua e Xuventude ao sector galego das artes escénicas, que en 2026 tamén contará con convocatorias específicas para a programación das salas privadas (nunha nova reformulación bienal que xa foi publicada no Diario Oficial de Galicia o pasado 19 de novembro), para a organización de festivais do sector, para a distribución de espectáculos e para a contratación de compañías galegas mediante o programa Cultura no Camiño.

Os 870.000 euros adxudicados este ano contribuíron a levar ás táboas 30 novas montaxes (19 de teatro, sete de danza e catro de circo) a cargo tanto de compañías xa referenciais no panorama escénico galego como de artistas individuais emerxentes e de colectivos de recente fundación.