FEST Galicia

FEST Galicia

FEST Galicia é a marca creada pola Xunta en 2018 para promocionar o territorio galego como destino musical, baixo criterios de calidade e sustentabilidade. Acolle festivais que funcionan de xeito profesional e que se preocupan por achegar valores engadidos á experiencia musical. E faino a través de todo o que transmiten, tanto na súa oferta de actividades como na súa xestión e organización.

FEST Galicia

Festivais adheridos 2024

Rompetiño Jump Festival
  • Onde? Porto do Son
  • Cando? 5 e 6 de xullo
  • Sobre o festival: nace en 2016 e xa se converteu nunha cita ineludible no panorama urbano nacional. Adheriuse en 2023 á marca FEST Galicia, aposta pola descentralización da oferta cultural galega e busca a conexión coa xuventude, achegando música fresca e especialmente dirixida ao público máis novo. Ademais da música, destaca pola inclusión de prácticas deportivas na programación, con competicións de basket 3x3, break dance, BMX e skate.
  • Web
Festival Sinsal SON Estrella Galicia
  • Onde? Illa de San Simón (Redondela)
  • Cando? Do 26 ao 28 de xullo
  • Sobre o festival: baseado na fórmula dun cartel sorpresa, o Sinsal é sinónimo de calidade e diversidade musical. Mais o público non o descobre ata desembarcar na illa. Ademais da música, o evento destaca pola posta en valor do patrimonio e o fomento da sostibilidade. Neste 2024, a organización porá en marcha a iniciativa #sinsalsenrastro para transformar o modelo de xestión de residuos e co obxectivo de lanzar unha mensaxe de concienciación entre o público.
  • Web
17º Festival Ribeira Sacra
  • Onde? Monforte de Lemos, Sober, Chantada, Castro Caldelas, Ribas de Sil e Nogueira de Ramuín
  • Cando? Do 26 ao 28 de xullo
  • Sobre o festival: a contorna da Ribeira Sacra convértese nunha protagonista máis, conectando público, música, gastronomía, patrimonio e territorio. O festival destaca polas súas iniciativas sostibles, como o uso de materiais biodegradables ou o seu plan de mobilidade e fomento do transporte colectivo.
  • Web 
SonRías Baixas
  • Onde? Bueu
  • Cando? Do 1 ao 3 de agosto 
  • Sobre o festival: cunha programación musical variada, no seu cartel teñen cabida o rap, o rock, o pop ou as músicas de raíz. Ademais, mestura nomes consolidados con artistas emerxentes e, por suposto, unha clara aposta pola música galega. 
  • Web 
Underfest Xacobeo
  • Onde? Vigo
  • Cando? Do 13 ao 20 de setembro
  • Sobre o festival: é unha iniciativa que xorde en 2018 coa intención de presentar en Vigo unha programación variada e diferente, que aglutina artistas internacionais xunto a unha selección de nomes nacionais, nunha aposta firme por ofrecer un menú musical de calidade e escapando das propostas habituais. Xa case metido no outono, é un festival de formato indoor, que aposta tamén por crear sinerxías coas salas da cidade.
  • Web 

Adhesión á marca

[16/07/2024] Publicada a adxudicación dos contratos de patrocinio con entidades privadas para a celebración de festivais de música profesionais baixo a marca FEST Galicia.

Adxudicación

[14/05/2024] A Axencia Galega das Industrias Culturais acaba de lanzar a nova convocatoria de adhesión á marca FEST Galicia cara á formalización dos correspondentes contratos de patrocinio co obxectivo de difundir a imaxe de Galicia vinculada aos festivais de música organizados por entidades privadas:

Convocatoria 2024
  • Dotación: 450.000 euros
  • Requisitos xerais:
    • Cumprir a normativa básica en materia de espectáculos públicos e demais lexislación aplicable.
    • Estar adheridos anteriormente a FEST Galicia.
    • Celebrarse entre o 15 de maio e o 30 de setembro de 2024, ambos os dous días incluídos.
    • Poñer á venda ao público xeral, conforme prezos de mercado, un mínimo do 95 % da súa capacidade.
    • Ter un orzamento de execución na edición do ano 2023 superior aos 100.000 euros, máis o IVE.
    • Programar un mínimo de dous artistas de Galicia.
    • Estar adherido ao programa Carné Xove da Xunta de Galicia.
    • Estar promovido por unha empresa privada.
  • Condicións de adhesión e dos contratos de patrocinio: DOG nº 83, do 14 de maio de 2024
  • Prazo de solicitude: do 15 de maio ao 5 de xuño de 2024

Obxectivos​

  • Situar os festivais galegos como un produto cultural e turístico capaz de atraer visitantes.
  • Proxectar Galicia como destino musical.
  • Promover os festivais galegos dentro e fóra da Comunidade.
  • Poñer en valor a industria musical.
  • Promover bandas e artistas de Galicia.
  • Vertebrar o territorio desde a sustentabilidade social e medioambiental.
  • Favorecer boas prácticas que sirvan como referencia para o sector.
  • Manter un diálogo permanente co sector.
  • Coordinar todos os departamentos da Administración galega relacionados con calquera dos ámbitos que abarca cada festival: turismo, xuventude, igualdade, medioambiente, calidade...

Informes de impacto

Nos inicios do seu lanzamento como marca, FEST Galicia realizou informes de impacto económico nos festivais adheridos co obxectivo de obter datos sobre o retorno directo, indirecto e inducido que estes eventos xeran en cada territorio. Tamén se mediu o impacto comunicativo e social dos eventos, así como o perfil das persoas que asisten a cada festival. As medicións foron desenvolvidas en 2018 e 2019 por un equipo consultor da Universidade de Santiago de Compostela (USC) integrado por varias persoas expertas no ámbito. Estes informes de avaliación serviron como punto de partida para traballar sobre medidas que incentiven a sustentabilidade social e medioambiental que a marca promove.

Manual de uso da marca

Os logotipos oficiais da marca FEST Galicia seguen as pautas de arquitectura de marcas institucionais conforme ao Manual de Identidade Corporativa da Xunta de Galicia.

Share