Sarabela Teatro leva ás táboas 'A metamorfose' de Kafka cunha das axudas da Xunta á creación escénica
O espectáculo estréase o vindeiro 4 de setembro no Teatro Principal de Ourense, onde tamén poderá verse os días 5 e 6
Carlos Álvarez Ossorio asina a dirección e a versión teatral en galego da célebre novela, que interpretan Fernando Dacosta, Elena Seijo, Fernando González, Sabela Gago e Fina Calleja
O Teatro Principal de Ourense acolleu esta mañá a presentación da estrea de A metamorfose, versión escénica da célebre novela de Franz Kafka, que Sarabela Teatro representará neste escenario do 4 ao 6 de setembro, ás 21,00 h. Para a produción desta nova montaxe, a veterana compañía ourensá dispuxo dunha das subvencións da Xunta de Galicia á creación escénica, que na súa convocatoria de 2025 distribúe 870.000 euros entre 30 novos espectáculos.
En concreto, segundo detallou o director da Axencia Galega das Industrias Culturais, Jacobo Sutil, a Consellería de Cultura, Lingua e Xuventude cofinancia con máis de 46.000 euros esta proposta de Sarabela, con dirección e dramaturxia de Carlos Álvarez Ossorio e as interpretacións de Fernando Dacosta, Elena Seijo, Fernando González, Sabela Gago e Fina Calleja.
Para a súa posta en escena, a compañía conta, ademais, con Baltasar Patiño a cargo da iluminación, Nuria Sotelo do movemento escénico, Ruth Díaz Pereira do vestiario e Renata Codda Fons do campo sonoro.
O responsable de Industrias Culturais acompañou o equipo na presentación aos medios de A metamorfose, na que tamén interviñeron o vicepresidente da Deputación Provincial de Ourense, César Gil; a directora do Teatro Principal, Olga Mojón; o director Carlos Álvarez Ossorio e o actor Fernando Dacosta.
Sutil subliñou o reto enfrontado por Sarabela ao adaptar para a escena galega a historia de Gregor Samsa, que forma parte do imaxinario colectivo universal como protagonista da que é unha das novelas máis icónicas do pasado século XX. Neste sentido, a compañía explica que aborda esta adaptación desde unha perspectiva contemporánea, conectando as obsesións de Kafka sobre a deshumanización coas angustias do ser humano actual.
Función da Rede Galega de Teatros e Auditorios
O representante da Consellería de Cultura, Lingua e Xuventude engadiu que o acompañamento a este espectáculo se estende igualmente á súa fase de exhibición, xa que unha destas tres primeiras funcións, a do venres 5 de setembro, se integra na programación semestral do espazo ourensán como membro da Rede Galega de Teatros e Auditorios, circuíto de espectáculos escénicos e musicais que a Xunta de Galicia cofinancia coas 43 entidades locais asociadas.
A Rede Galega de Teatros e Auditorios tamén achegará A metamorfose ao Pazo da Cultura de Narón o 22 de novembro e ao Auditorio Municipal de Vigo o 29 dese mesmo mes. Ao tempo, o Teatro Principal de Ourense acollerá ata finais de ano outras seis actuacións do devandito circuíto autonómico a cargo doutras tantas compañías de teatro e danza.
Imaxes relacionadas
