Constituída en 1996, a Rede Galega de Teatros e Auditorios consolidouse neste anos como o principal circuíto para a exhibición da produción escénica galega de carácter profesional, á que dota de estabilidade na súa programación habitual. A Xunta de Galicia cofinancia esta rede cos concellos e entidades xestoras dos espazos asociados. O seu calendario de funcións estrutúrase en períodos semestrais de programación, nos que teñen cabida todas as artes escénicas e musicais, con especial protagonismo do teatro e das compañías galegas.
Durante os seis primeiros meses de 2024, a Rede Galega de Teatros e Auditorios ofreceralle ao público de 41 concellos un total de 351 funcións de teatro, música, danza, circo e maxia da man de 130 formacións artísticas, galegas na súa meirande parte.
En concreto, poderán verse máis de 270 funcións teatrais cunha ampla oferta para o público familiar, que concentra 92 destas actuacións. A danza e o circo continúan aumentando a súa presenza nesta carteleira, con 34 e 14 representacións respectivamente, mentres que a maxia suma oito. En canto á música, o circuíto autonómico conta con 23 concertos programados.
Ademais, este semestre a Rede acollerá algunhas das agardadas novidades da temporada escénica galega, con sete estreas a cargo de Paula Pier, Cali Danza, Manekineko, Sarabela Teatro, Producións Teatrais Excéntricas, Elvi Balboa e Talía Teatro.
- Consulta a programación en PDF
- Carteleira actualizada na nosa sección de Axenda e na de Cultura de Galicia
