Rede Galega de Teatros e Auditorios
Constituída en 1996, a Rede Galega de Teatros e Auditorios cumpre 30 anos consolidada como o principal circuíto para a exhibición da produción escénica galega de carácter profesional, á que dota de estabilidade na súa programación habitual. A Xunta de Galicia cofinancia esta rede cos concellos e entidades xestoras dos espazos asociados. O seu calendario de funcións estrutúrase en períodos semestrais de programación, nos que teñen cabida todas as artes escénicas e musicais, con especial protagonismo do teatro e das compañías galegas.
Durante o primeiro semestre de 2026, a Rede Galega de Teatros e Auditorios ofreceralle ao público de 42 concellos un total de 307 funcións de teatro, música, danza, circo e maxia da man de 102 formacións artísticas, galegas na súa meirande parte. Así, desde xaneiro a xuño, poderán verse 236 funcións de teatro, 29 de danza, 12 de circo, 7 de maxia e 23 actuacións musicais.
Ademais, neste primeiro semestre a Rede acollerá as estreas dos novos espectáculos de Fran Sieira Compañía de Danza, Ibuprofeno Teatro, De Ste Xeito Producións, Os Náufragos Teatro, Artyc Content, Talía Teatro ou Carlota e Compañía.
- Consulta a programación do primeiro semestre en PDF
- Carteleira actualizada na nosa sección de Axenda e na de Cultura de Galicia
- Convocatorias asociadas
Foto da portada da web: Rocío Cibes [Transeúnte, de Daniel Rodríguez Cia]
