Espiño

A perseveranza e a experiencia avalan o creador de cancións compostelán Alfonso Espiño, quen leva máis de media vida facturando música pop en combos xa de culto como Contrastes, Mega Purple Sex Toy Kit ou Los Chavales.

En solitario como Espiño desde 2016, segue explorando xunto co seu grupo as posibilidades do pop lisérxico, erixíndose en estandarte da neopsicodelia en Galicia e en galego, acuñando o termo galedelia. Acompaña a Espiño (baixo e voz) nesta etapa da súa andaina musical a banda composta por Ale González (teclados), Brais Sánchez (guitarras) e Fran Facal (batería).

O grupo naceu alzándonse co primeiro premio do II Certame Galicia Creativa en novembro de 2016, sendo tamén finalista dos Premios Martín Códax da Música en 2018, 2019 e 2021. Nas súas gravacións, Espiño é xeneroso co detalle e os arranxos instrumentais, que flúen en sintonía cunha lírica rica en personaxes fascinantes e lugares máxicos, inspirados pola paisaxe natural e a melancolía de Galicia. Sobre os palcos, a banda ofrece un enérxico directo que tamén conta con momentos puntuais para o recollemento e a emoción.