López Campos visita o equipo da película ‘O pesadelo das vacas’ na súa rodaxe en Lalín
A Xunta de Galicia cofinancia este novo título da compañía Matriuska cunha achega de 280.000 euros a través da súa liña de subvencións á produción e coprodución de proxectos audiovisuais galegos
María Vázquez e Diego Anido encabezan o reparto desta historia ambientada no rural do interior galego
O Lalín Arena está a ser un dos escenarios da rodaxe na provincia de Pontevedra de O pesadelo das vacas, primeira longametraxe de ficción do director Rafa de los Arcos, para a que a compañía Matriuska conta cunha das subvencións da Xunta de Galicia á produción de proxectos audiovisuais galegos. Ata esta localización desprazouse esta mañá o conselleiro de Cultura, Lingua e Xuventude, José López Campos, para coñecer de primeira man o avance da filmación, que arrancou a finais de setembro e se desenvolve tamén en diferentes escenarios dos concellos de Rodeiro e Silleda.
O propio Rafa de los Arcos e o produtor Daniel Froiz recibiron o conselleiro e o director da Axencia Galega das Industrias Culturais, Jacobo Sutil, nesta visita ao set de O pesadelo das vacas, na que participaron tamén o presidente da Deputación Provincial de Pontevedra, Luis López; o deputado provincial de Cultura, Jorge Cubela; o alcalde de Lalín, José Crespo; o de Rodeiro, José Luís Camiñas; a alcaldesa de Silleda, Paula Fernández, e Vanessa Grela e Javier Lopo, en representación da Corporación de Servizos Audiovisuais de Galicia.
O titular de Cultura da Xunta de Galicia tivo a oportunidade de saudar e felicitar o equipo técnico e artístico desta nova longa galega, con María Vázquez e Diego Anido á cabeza dun reparto do que tamén forman parte Antía Vidal, Eduardo Rodríguez Cunha “Tatán”, Berta Ojea e Xoel Fernández.
Aposta polo cinema autoral
Mastriuska Producciones dispón por parte da Consellería de Cultura, Lingua e Xuventude dunha axuda de 280.000 para este novo proxecto, co que continúa afondando na súa aposta polo cinema emerxente e autoral como xa fixera con anteriores producións como a premiada Matria, tamén con María Vázquez como protagonista, As altas presións, A estación violenta ou A Foreign Song, entre outras.
A produtora pontevedresa ponse agora á fronte do debut na dirección de longas de ficción do realizador vigués Rafa de los Arcos, quen conta cunha ampla experiencia audiovisual en cinema documental, curtametraxes, televisión e publicidade. En O pesadelo das vacas asina tamén o guión, xunto a Miguel Ángel Blanca, para abordar unha historia ambientada no rural do interior de Galicia desde unha perspectiva de xénero.
Nela, Celia é unha muller que se enfronta a un camiño complexo, cunha familia desestruturada e nun ambiente hostil no que terá que atopar o seu espazo. Ao tempo, o filme reflexiona sobre a violencia e as pegadas que deixa nas familias das persoas que a exercen.
Imaxes relacionadas
