Impulso ao proceso de creación dos seis proxectos audiovisuais galegos seleccionados para o Conecta LAB da asociación CREA
Eire Cid, Jacobo Lagüela, Álvaro Alvite, Olga Osorio, Judith Adataberna e Clara Coira con Miguel Casaseca asinan as propostas que recibirán asesoramento de guión e dirección
Tamén se desenvolverán actividades formativas en formato coloquio e masterclass nas que participan recoñecidas figuras do cinema galego, español e portugués
A terceira edición do Conecta LAB, laboratorio e residencia artística para o desenvolvemento de proxectos audiovisuais, reúne ata o 7 de abril na illa de San Simón os creadores e creadoras dos seis proxectos seleccionados este ano xunto cun equipo especializado de cineastas e persoas expertas para avanzar en aspectos artísticos e narrativos. A iniciativa, organizada pola Asociación Galega de Profesionais da Dirección e Realización CREA, conta co apoio da Xunta de Galicia para impulsar a materialización de novas longametraxes e series de autoría galega.
O director da Axencia Galega das Industrias Culturais, Jacobo Sutil, en representación da Consellería de Cultura, Lingua e Xuventude, participou esta tarde na inauguración oficial e benvida de participantes, nun acto que compartiu con Fon Cortizo, presidente de CREA, e demais institucións e entidades implicadas. Así, explicou que esta iniciativa consolida a liña de colaboración que o Goberno galego vén levando a cabo desde hai varios anos co devandito colectivo profesional no obxectivo común de prestarlle ao audiovisual galego todas as oportunidades posibles para o seu avance.
Tamén fixo referencia ao marco natural e de peso histórico que achega a illa de San Simón e a súa contorna como o idóneo para o formato de convivencia de Conecta LAB, de xeito que os sete proxectos participantes poidan continuar os seus procesos creativos e chegar ás pantallas. “Unha dinámica que concorda perfectamente cos obxectivos da Xunta de Galicia respecto á consideración estratéxica do noso audiovisual e á posta a disposición tanto de liñas de subvención como de accións concretas para incidir e favorecer cada un dos momentos que van entre a creación e a distribución audiovisual, entendido este proceso dun xeito transversal e interrelacionado”, expresou.
No caso concreto do Conecta LAB, este apoio céntrase no impulso e acompañamento do proceso de creación, escrita e desenvolvemento de longametraxes, series e proxectos transmedia, tanto de ficción como documentais, de xeito que entronca con varias das liñas de axudas ao sector que a Xunta convoca anualmente, como as dirixidas á promoción do talento, ao desenvolvemento e a produción e coprodución de proxectos.
Catro longametraxes, unha serie e un formato transmedia
A comisión nomeada por CREA seleccionou para Conecta LAB 2025 catro propostas na categoría longametraxes de ficción: Os reis imaxinarios, de Eire Cid, ambientada nun barrio obreiro de Vigo co tema das masculinidade fráxiles de fondo; A vella e o cocho, na que Jacobo Lagüela desenvolve unha autoficción familiar en homenaxe ás avoas; A nena que quería ser Fred Astaire, unha comedia dramática sobre unha familia disfuncional que asina Olga Osorio; e Memoria de emerxencia, un drama familiar que Judith Adataberna presenta envolto en historias de pantasmas.
Tamén recibirá acompañamento o proxecto transmedia Tramoloxía, no que Álvaro Alvite toca temas como a apropiación cultural e a identidade, o afán de éxito das xeracións mozas e a mercantilización da arte e a cultura cun ton satírico e acedo. A sexta proposta participante, seleccionada tras o seu paso polo Conecta + celebrado o pasado 24 de xaneiro en Pontevedra, é a serie de ficción Damero maldito, asinada por Clara Coira e Miguel Casaseca, na que se retrata a realidade das mulleres que asumen un rol de coidadoras a través dunha historia de terror e violencia psicolóxica.
Sobre esta escolma, o director de Industrias Culturais celebrou que catro dos seis títulos presentes en Conecta Lab tiveran apoios precedentes por parte da Xunta: son os casos de A nena que quería ser Fred Astaire, A vella e o cocho e Damero maldito, os tres con subvención á escrita de guión. Tamén Os reis imaxinarios obtivo axuda autonómica para desenvolvemento. “No seu conxunto ‒dixo‒ constitúen unha boa mostra do talento e a versatilidade actuais do sector”.
Titorías, masterclass en liña e música
Na nómina das titorías, con especialistas escollidos de forma participada polos propios proxectos con asesoramento do equipo de Conecta LAB, atopamos as cineastas catalás Neus Ballús e Belén Funes, a consultora Ana Sanz-Magallón, o director, guionista e actor portugués André Gil Mata, o experto en comunicación Álvaro Vega e tamén profesionais do sector galego como a guionista Araceli Gonda ou o creador Enrique Lojo.
Ademais das asesorías de guión e dirección centradas nos seis proxectos seleccionados, durante o Conecta LAB terán lugar varias xornadas formativas en liña. Javier Macipe ofrecerá unha masterclass arredor do proceso creativo de La estrella azul coa que acaba de gañar o Goya a mellor dirección novel; Ángel Santos, Ángeles Huerta, Anxos Fazáns, Andrés Goteira e Eloy Domínguez Serén participarán nun coloquio sobre o cinema galego que vén, e os guionistas Beto Marini (El 47) e Fernando Navarro (Segundo Premio), a analista e asesora Ana Sanz-Magallón (Alcarràs) e Begoña Robles, executiva creativa de Amazon Prime, achegarán as súas experiencias sobre o tratamento dunha longametraxe.
Tamén están previstas varias sesións sobre o proceso creativo e a inspiración a cargo de proxectos musicais como Modulador de Ondas, no que o compositor e thereminista galego Paulo Pascual crea atmosferas cinematográficas; L.A.R. Legido, investigador sonoro, que desenvolve un enfoque experimental en proxectos como Sumrrá, IGMIG ou Nacho.Faia.Lar; Traspielas, o proxecto de recollidas sobre a memoria colectiva da aldea da cantante e compositora galega Su Garrido Pombo; e Garza, onde Adrián Charlín mestura electrónica e estilos experimentais e de club.
Imaxes relacionadas
