Galicreques celebra os seus 30 anos a prol do teatro de marionetas
A Sala Capitol acollerá este mércores a festa de inauguración do certame a modo de encontro para o sector escénico galego
O programa ofrece preto de 60 funcións de 33 compañías e a estrea de 16 espectáculos
Trátase dunha das 13 citas cofinanciadas pola Consellería de Cultura, Lingua e Xuventude a través das subvencións a festivais de artes escénicas
O Festival Internacional Galicreques celebra a súa trixésima edición entre o 11 e o 19 de outubro en distintos espazos de Santiago de Compostela cun programa que inclúe preto de 60 funcións, 15 delas para escolares, a cargo dunha trintena de compañías chegadas de seis países e sete comunidades autónomas. Ademais, este mércores día 8 o sector escénico galego darase cita na Sala Capitol para a festa do 30 aniversario deste certame, cofinanciado pola Xunta de Galicia cunha achega de máis de 42.000 euros a través da liña de axudas a festivais de artes escénicas.
Así o explicou hoxe o director da Axencia Galega das Industrias Culturais, Jacobo Sutil, na presentación de Galicreques 2025, nun acto no que tamén participou o director do festival, Jorge Rey, e representantes do resto das institucións que colaboran con esta cita pioneira no teatro de marionetas. O representante da Consellería de Cultura, Lingua e Xuventude explicou que o encontro compostelán volve ocupar un lugar destacado na listaxe de mostras escénicas subvencionadas polo Goberno galego, que este ano distribuíu 280.000 euros entre 13 citas.
Produción galega
Fixo fincapé, así mesmo, na variedade e calidade da produción dos espectáculos deste xénero dentro da nosa Comunidade, representada no festival polas propostas de Os Monifates, Luis Vallecillo, Mircromina Teatro, K’Paparota e Danthea Teatro, Teatro Escena, Carmen Domech, Kalina Teatro, Bico de Toupa, Títeres Cachirulo e Nauta Teatro.
A 30ª edición do Festival Internacional Galicreques terá o seu epicentro na carpa instalada no paseo central da Alamada de Santiago e estenderá a súa actividade a diferentes espazos da cidade, como os centros socioculturais de Conxo, Romaño, Ensanche, Santa Marta, Laraño, Fontiñas, Lavacolla, A Gracia, Castiñeiriño e Vite, así como ao Teatro Principal, á Fundación SGAE, á Reixa e, por vez primeira, á Sala Capitol.
Estreas galegas e internacionais
Galicreques 2025 acollerá 16 estreas, entre elas as de catro formacións galegas. Así, Kalina Teatro pesentará a súa peza Limonardo dá vento o venres 12, Mircromina Teatro dará a coñecer Pasmo de pedra o sábado 11, e Nauta pechará o festival coa súa nova obra, Ephimeros, o domingo 19. Ademais, K’paparota e Danthea Teatro estrearán o luns 13 a peza Verán na lavandería no marco do programa de funcións escolares.
No panorama internacional, destacan as estreas de formacións como El Guiñol del Guiñol (Colombia), que presentará El último árbol o sábado 11. Ese mesmo día poderá verse por primeira vez Lazarillo del riachuelo, do arxentino Gonzalo Guevara. E desde Arxentina chegarán tamén outras dúas propostas inéditas: Tape y otros cuentos, de Roberto White, e La luna como testigo, de Agarrate Catalina.
Unha das estreas mundiais máis esperadas é a da compañía portuguesa Fío D’Azeite, que representará O rei vai nu o domingo 12. Tamén botarán andar en Galicreques as novas montaxes de Títeres Candelilla (Chile) con Kuiyen, sueño mapuche o martes 14; Zaches Teatro (Italia) con Cenicienta o mércores 15, e Andarte Sonando (México) con Ya se armó la Titerelia o sábado 18 de outubro.
Tamén verán a luz en Galicreques as novas propostas de formacións xa coñecidas polo público do festival. É o caso de Panta Rhei, compañía vasca galardoada co Premio Galicreques en 2018, que trae a Santiago Krim, pequeño lobo o xoves 16, ou a catalá Fil de Guá, que chegará ese mesmo día coa súa nova obra, Emproianova. As outras dúas estreas incluídas nos cartel poderán verse o venres 17 da man de Txotxongillo Taldea (País Vasco) coa función escolar de Caminos para la poesía e La Tartana (Madrid) con Un hilo me liga a vos, para público xeral.
Imaxes relacionadas
