Únicos

Con Únicos, DÁ.TE Danza presenta unha creación de danza contemporánea dirixida á infancia (3 a 6 anos) e público familiar que explora como se constrúe a identidade desde os primeiros anos de vida. A peza aborda o proceso de recoñecerse, desequilibrarse, transformarse e atopar o propio centro, entendendo a infancia como un territorio fértil onde o eu aínda se está configurando.

Inspirada nas esculturas cinéticas de Alexander Calder, a proposta utiliza o equilibrio, a mobilidade e a fraxilidade como metáforas do crecemento interior. En escena, dous corpos dialogan desde o incerto, tenteando formas de ser e de estar no mundo, nunha dramaturxia física e poética onde a danza se converte en estrutura de pensamento. Únicos propón unha viaxe existencial accesible, sensible e dinámica, que invita a preguntarse: Cando deixamos de ser quen somos? Canto peso ten a mirada externa na nosa identidade? Somos o que outros din que somos?