Terrafirme

Peza de danza contemporánea creada por Eva Comesaña, que navega entre diferentes mares para atopar tradición, costumes e calma na terra.

Procura dun lugar que habitar e desenvolver a vida. Un lugar firme e seguro onde profundar nas raíces propias, cheas de coñecemento e sabedoría popular. Cultura, xentes e maneiras de facer en comunidade son a esencia do son, imaxes, movemento, cores e texturas desta peza que fala de lugares rurais e marisqueo, onde os corpos son os escravos da supervivencia e do traballo, corpos que ven modificados polo esforzo, a repetición, o peso e a resistencia.. 

Terrafirme afonda na memoria para facer reflexión do presente, recuperando labores das nosas devanceiras que alimentan a imaxinación e transpórtannos ás nosas raíces. Ten como nexo común as corporalidades sistémicas de mulleres que cargan auga na cabeza, machucan o millo, lavan e secan no río e coidan en albas.

É unha viaxe pola memoria e herdanza que levamos intrínseca polo feito de ser humanas, e así poder deixar camiño, alento e coñecemento en forma de arte, profundando na linguaxe, nas formas dos corpos, no que hai fóra, para poder entender o que temos dentro. Mostrar, desde un mirar, fogar e conciencia colectiva, política e feminista.

• En caso de choiva, a actuación trasladarase ao local social de Ribasar