Rede Galega de Música ao Vivo: inscrición de concertos no catálogo de 2025

Ábrese do 11 de novembro ao 2 de decembro de 2024 o prazo de inscrición de concertos no catálogo a partir do que se configurará a programación de 2025 da Rede Galega de Música ao Vivo nas seis salas beneficiarias da última convocatoria:

• A Arca da Noe (Vilar de Santos)
• A Pousada da Galiza Imaxinaria (Boiro)
• Club Clavicémbalo (Lugo)
• La Pecera (Vigo)
• LaRoom (Ferrol)
• Sala Guión (Pontedeume)

Poderán achegar as súas propostas a través da plataforma www.galescena.gal aqueles grupos profesionais de música con sede, domicilio social ou establecemento permanente en Galicia, quedando excluídas as asociacións culturais.

A partir deste catálogo, as devanditas salas configurarán a súa programación musical como parte da Rede Galega de Música ao Vivo seguindo os requisitos relacionados no artigo 4.1.1 das bases das subvencións para o desenvolvemento de proxectos de programación musical na Rede Galega de Música ao Vivo.