Encontro de Música Aberta: A Coruña, 6 de novembro
A Fundación Paideia Galiza, co apoio da Axencia Galega das Industrias Culturais, organiza o I Encontro de Música Aberta co obxectivo de sintonizar o sector musical galego arredor dunha xornada aberta a todos os públicos e centrada na formación, o debate e o networking.
Esta nova iniciativa terá lugar o mércores 6 de novembro, entre as 07:00 e as 14.00 h, nos Estudios Mans da Coruña (Polígono de Pocomaco. Quinta Avenida, 91). O acceso é libre, con inscrición previa a través da web da Fundación Paideia.
Participarán nesta xornada o artista Abraham Cupeiro co seu singular espectáculo Resoando no pasado e cunha masterclass de creación de instrumentos, así como o dúo Soleado, novo grupo de fusión indie-folk formado polo guitarrista e compositor de Vetusta Morla Juanma Latorre e a cantante e compositora Ester Rodríguez, que participarán nun showcase comentado.
O diálogo chegará da man de Laura Iturralde, que moderará a conversa creativa Show Must Go On!: da teoría á práctica dos espectáculos en vivo, xunto a artistas Marta Verde, Teresa Tresandí e Víctor García Aka Death Whistle. Antes e para darlle o pistoletazo de saída á iniciativa, de 07.00 a 09.00h, terá lugar a retransmisión en aberto, con público en directo, do programa de referencia de Radio 3 Hoy empieza todo, guiado pola xornalista Irene Valiente.
PROGRAMA I ENCONTRO DE MÚSICA ABERTA
7.00 a 9.00h. Retransmisión en directo de Hoy empieza todo, de Radio 3, con Irene Valiente.
9.00 a 9.30h. Café.
9.30 a 10.45h. Abraham Cupeiro: Resoando no pasado.
10.45 a 11.30h. Abraham Cupeiro: masterclass de construción de instrumentos.
11.30 a 12.00h. Café.
12.00 a 12.30h. Showcase comentado de Soleado.
12.00 a 12.30h. Show Must Go On!: da teoría á práctica dos espectáculos en vivo. Diálogo creativo coa moderadora Laura Iturralde e a participación de Marta Verde, Teresa Tresandí e Víctor García Aka Death Whistle.
13.50 a 14.00h. Peche.
