Encontro Conecta: inscrición ata o 12 de novembro
A Axencia Galega das Industrias Culturais patrocina a 13ª edición do encontro Conecta, que terá lugar o vindeiro 16 de novembro en Santiago de Compostela baixo a organización de CREA Asociación Galega de Profesionais da Dirección e Realización. O prazo de inscrición está aberto ata o 12 de novembro.
O evento está pensado para poñer en contacto guionistas e profesionais da dirección co obxectivo de obter retorno, consello profesional e/ou atopar eventuais acordos de colaboración.
Está dirixido a un amplo abano de creadores e creadoras, desde profesionais ata estudantes, con proxectos en calquera fase de desenvolvemento. A mecánica consiste nunha serie de reunións persoais onde se explican e se escoitan proxectos, polo que a inscrición pode ser con proxecto ou sen el.
Conecta celebrarase na sede da Fundación SGAE, en horario de 10 a 14 horas. Xa pola tarde, terá lugar unha posta en común, así como unha presentación das bases e novidades da vindeira edición de Conecta Lab.
