Promoción do coñecemento etnográfico desde o audiovisual mediante a mostra organizada polo Museo do Pobo Galego
A sección competitiva ‘Galicia’ proxectará obras de Bea Lema, Sabrina Fernández Casas, Berio Molina, Daniel Pérez Silva e Diana Toucedo
O Goberno galego leva apoiando a celebración do certame a través da liña de axudas a festivais audiovisuais da Consellería de Cultura, Lingua e Xuventude
O Museo do Pobo Galego acolleu hoxe a presentación do programa completo da súa 21ª Mostra Internacional de Cinema Etnográfico, que volve ao encontro co público do 10 ao 15 de marzo en Santiago de Compostela a través dunha carteleira centrada na antropoloxía visual e a súa difusión a través das pantallas. A Xunta de Galicia vén apoiando ao longo dos últimos anos os contidos e obxectivos desta iniciativa no marco das subvencións para festivais audiovisuais de carácter profesional, unha convocatoria actualmente en trámite de resolución para os eventos de 2026.
Así o explicou o director da Axencia Galega das Industrias Culturais, Jacobo Sutil, durante a súa intervención na rolda de prensa da nova edición da Mostra, nun acto compartido entre a organización do certame e demais institucións colaboradoras.
En representación da Consellería de Cultura, Lingua e Xuventude, Sutil tamén incidiu no valor do medio audiovisual como garante da custodia e promoción da memoria colectiva, os costumes e a idiosincrasia de Galicia, así como da importancia da xeración e salvagarda de novos materiais neste eido que poidan chegar ás futuras xeracións. Neste sentido, subliñou a importancia das conexións estratéxicas do festival co Cineclube da Facultade de Ciencias da Comunicación da universidade compostelá ou a acción formativa realizada no marco da sección Aula da pasada edición do festival Novos Cinemas de Pontevedra en colaboración coa Universidade de Vigo.
Exhibición, pensamento e creación
A 21ª edición do festival comprende unha programación que combina exhibición, pensamento e procesos creativos. Destacan nela dous proxectos de vocación e dimensión internacional: a retrospectiva coa filmografía completa de natureza híbrida e experimental cultivada por Maddi Barber, intimamente ligada ao territorio pirenaico, e un foco dedicado a Zinema Auzolanean, experiencia colectiva desenvolvida en Navarra por Hiruki Filmak, que propón unha reflexión sobre autorrespresentación, procesos comunitarios e metodoloxías compartidas.
Produción galega
A Mostra Internacional de Cinema Etnográfico renova tamén nesta nova entrega o seu compromiso coa produción audiovisual galega, a través dun percorrido que atinxe animación, ensaio audiovisual, cinema sensorial e propostas moi vinculadas ao territorio. El cuerpo de cristo, de Bea Lema; Alboroque, de Sabrina Fernández Casas; Furada Negra, de Berio Molina; A voz de tódalas cousas, de Daniel Pérez Silva; e La historia todavía no conoce mi nombre, de Diana Toucedo, son os títulos a competición que se proxectarán na Sección Galicia.
Ademais, a peza inaugural do certame o vindeiro día 10 no Teatro Principal de Santiago de Compostela será Redeiras de A Guarda, creada especialmente para o festival a partir da investigación desenvolvida pola artista sonora Acacia Ojea arredor do oficio de confeccionar e reparar as redes de pesca. O proxecto conta coa colaboración da artista visual Arancha Brandón, natural desa vila pontevedresa, para configurar unha proposta híbrida e experimental na que dialogan o rexistro sonoro, a transmisión oral e a construción visual.
- Máis información na web da MICE
Imaxes relacionadas
