O CGAI pon en marcha unha nova sección para difundir o cine galego da man de personalidades da nosa cultura
Coordinado por Antón Reixa, o programa Pensando en cine, pensando en Galicia dá comezo mañá coa poeta Yolanda Castaño e a película Mimosas, de Oliver Laxe
O CGAI-Filmoteca de Galicia abre mañá unha nova sección destinada a poñer en valor o cine galego en colaboración con personalidades da nosa cultura que traballan en eidos distintos ao audiovisual. O programa Pensando en cine, pensando en Galicia, cunha entrega cada dous meses, está coordinado polo artista, músico e produtor Antón Reixa.
O líder da mítica banda Os Resentidos convidará en cada ocasión un profesional da cultura para presentar un filme galego da súa elección. As proxeccións comezan mañá ás 18,00 h. con Mimosas de Oliver Laxe, aposta da poeta Yolanda Castaño, que será a primeira protagonista destes encontros para as tardes dos sábados. A autora deProfundidade de campo explicará os motivos da súa escolla nunha introdución á película. Ao termo da sesión producirase un debate arredor do filme, moderado polo propio Reixa.
Mimosas é un dos títulos máis populares da nosa cinematografía recente. Segunda longametraxe do realizador Oliver Laxe, principal figura do Novo Cinema Galego, foi galardoada no prestixioso festival de Cannes en 2016 co premio principal da Semana da Crítica. Conta a historia dunha caravana que axuda a chegar a un Sheikh ao seu lugar de repouso nunha aventura polos montañas do Atlas marroquí.
Próximas citas
Os próximos convidados a participar en Pensando en cine, pensando en Galicia son o premio nacional de literatura infantil e xuvenil Xabier P. Docampo, cuxa novela A casa da luz foi levada ao cine por Carlos Amil; e Susana Seivane, reputada gaiteira de traxectoria internacional. Eles elixirán dous filmes a proxectar entre marzo e xuño no CGAI, en datas aínda por determinar.
Con esta sección, Antón Reixa pretende ofrecer unha nova lectura das películas de Galicia, habitualmente presentadas desde a propia cinefilia e sen tender lazos con outras artes. A iniciativa permite aproximarnos ao noso cine desde diversas perspectivas que enriquecen as obras, moitas das cales serán verdadeiras apostas rescatadas do esquecemento para poñer en valor a variedade da cinematografía galega.
