Desembarco galego no Festival de San Sebastián na procura de ampliar fronteiras para o noso audiovisual

A Xunta de Galicia volve dar apoio á presenza e promoción do audiovisual galego no Festival Internacional de Cine de San Sebastián, que se celebra estes días na capital donostiarra e onde se busca continuar avanzando na proxección exterior do noso cinema.

Nesta 74ª edición do certame, a actividade da representación galega focalízase en varios apartados de interese. En primeiro lugar, no evento promocional organizado pola Xunta de Galicia esta mesma tarde no Kursaal baixo as marcas Films From Galicia e Galicia Film Commission. A el están convidados representantes de festivais, axentes de vendas, distribuidoras e produtoras internacionais acreditadas no festival.

Así mesmo, a Axencia galega das Industrias Culturais colabora un ano máis co Festival Internacional de Cine de San Sebastián para favorecer a participación de produtoras emerxentes galegas, desta volta 11, no programa 'Meet Them' do apartado Industria.  

Este ano, ademais, a sección Made in Spain programa dúas películas que contan con subvención da Xunta de Galicia: 'Así chegou a noite', de Ángel Santos, e 'Os convidados', coprodución con Alemaña dirixida po Stefan Butzmühlen e Cristina Diz.